يوميات في المشروع - اللب والهريسة

سواق بيزمر لكل الناس وبيقف علشان يركب أي حد
معاه مكان أو معهوش
اللي واقف عايز يركب أو مش عايز
بيقف لأي حد وأي حاجة
لو مشوارك بياخد ربع ساعة
فحضرتك هتآنسنا شوية زيادة
ساعة كدة بس.. وتحمد ربنا إنك هتنزل سليم
سواق غريب
مشغل أغاني بصوت عالي
وبيمشي بسرعة أوي
فجأه السواق وقف وقال كل الناس تقفل إزاز العربية كويس
وقفل كل مفاتيح اللوك بتاعة العربية -اللي هي المسوجر يعني-
الناس قالت له: فيه إيه؟!
قال لهم: أصل فيه خناقة قدام وممكن حد يفتح العربية ولا يعمل حاجة فيها
الراجل خايف علينا كتر خيره
راجل محترم –بغض النظر عن اللي كان بيعمله-
وهو ماشي وعدينا على الخناقة
اللي مكانتش خناقة ولا حاجة
كانت مجرد حادثة على الطريق
السواق قال كلام غريب
خلاني تنحت
قال: يادي القرف اللي احنا فيه
أهو دة اللي خدناه من الثورة واللي عملوا الثورة
كان ماله حسني مبارك؟
ما الراجل كان زي الفل
على الأقل كنا عايشين في ضله
وكان مخلينا في أمان وهَنا
مش كل يوم قرف وخناقات
لحظة كدة
الراجل دة قال: (ضله)
على أساس إن حسني مبارك يعني كان إيه؟
طائر رخ ولا ستاير قبنوري ضد الشمس؟
ضل مين يا ابو ضل؟!
واحد رد عليه قال له: مين وكنا عايشين فى ضله إيه
قال له: حسني مبارك
الناس تنحت
وأنا طبعًا جالي هيستريا ضحك
المهم إن السواق ماسكتش
قعد يعدد في محاسن مبارك
محاسن ولا جمالات أهو كله محصل بعضه
هو كان فيه زيه؟
دة راجل ماخلاناش ندخل في حرب 30 سنة –يادي أم الجملة اللي حافظينها مش فاهمينها دي-
الناس كانت عايشة مرتاحة بتاكل لب وهريسة
الراجل بيقول لب وهريسة
حد يقول لي إنه بيهزر يا جدعان
دة على أساس إن حسني مبارك كان اللب والهريسة ضمن برنامجه الانتخابي
ولا كان بيوزعهم على الشعب ببلاش ولا إيييييييييه؟!!
وإيه علاقة اللب والهريسة بالاستقرار والحرية والعدالة والكلام دة كله
يادي الوكسة على الناس اللي مش فاهمة وعاملة نفسها فاهمة
واللي فاهمة وعاملة نفسها مش فاهمة
واحد قال للسواق: على جنب
وهو نازل
قعد ينادي
امسك سواق فلول
امسك سواق فلول
 
كتاب المئة تدوينة. Powered by Blogger.

التصنيفات

القائمة الكاملة للتدوينات

 

© 2010 صفحة التدوينات المرشحة لكتاب المئة تدوينة