مش هتعرف تبقى حد تاني غير نفسك..
نفسي الناس تفهم.. إنك مش لازم تمثل عشان الناس تحبك, ومش لازم تمشي مع الموضة عشان تبقى "كوول" وعندك شلة صحاب حلوين.. لازم هتلاقي حد على الأقل بيحبك كدة زي ما انت..
مهما كنت.. اعترف بصفاتك.. سواء كانت حلوة احتفظ بيها، أو مش حلوة وحاول تحسنها.
ومتغيرش من نفسك أبدًا عشان حد.. اللي عايزك هيقبلك "بسلطاتك و بابا غنوجك :)".
خليك واضح من البداية ومتمثلش.. إنت مش مجبر قدام حد إنك تتصرف حسب طريقة معينة هما عايزينها..
أنا اكتشفت دي بعد ما خدت بالي إن الكيان الشرير اللي اسمه الجامعة دة.. بدأ يغير مني!!
هنا خدت وقفة وقلت لأ.. مش أنا اللي هتغير.
أنا بنت بحب أشتري الهابي ميل في الخباثة عشان آخد اللعبة.
أنا بنت بحب أتفرج على أفلام رومانسية وأتخيل نفسي مكان البنت اللي فيها.
أنا واحدة أكتر حاجة بحبها في حياتي القراءة.. حتى لو فضلتوا تتريقوا عليا لحد آخر يوم في عمري.
أنا واحدة بحب أسمع أغانى وأتخيل نفسى بغنيها والناس بتصقف لي.
أنا واحدة مش بعرف أفتح كلام بس لو فتحت معايا كلام في موضوع عاجبني ممكن أتكلم 3 أيام متواصلة.
أنا بنت طوول عمري بحب أقعد مع نفسي ومع عدد محدود من الأصحاب أصحاب العقول المشابهة ليا.
أنا بنت بحب آكل الآيس كريم براحتى لحد ما يسيح ويبقى مية كدة.
أنا بنت بحب بشدة وبكره بشدة معنديش وسط Ya Black or White.
أنا بنت عندي صفات كتيرة نص اللي حواليا ميعرفوهاش بس معنديش مانع بحب يكون عندي أسراري.
أنا واحدة بتفرج على الكارتون لحد دلوقتى.. كله.!!!
أنا بنت متقلبة المزاج أووي.. بس سر سعادتي بسيط.. شوية اهتمام وحب "كتير شوية" يفرحوني.
أنا بنت بسمع أغانى كوري وياباني.. و اتريقوا لبكرة بقى.
أنا بنت عنيدة أكتر من العناد نفسه.
أنا عندي صفات أكتر من كدة.. ومش هغيرها لأنى فخورة بيها ودي صفات كوّنتني وخلتني ما أنا عليه دلوقتي، ولو غيرتها أو فكرت أغيرها عشان حد هزعل أووي.
خليك واثق من نفسك وصفاتك ومتغيرش من نفسك.. إستنى اللي هيقدّر صفاتك دي.
وعلى رأي مكي: "متحاولش تبقى أي حد تاني غير نفسك".
