محتاج كام مرة تموت؟

في العتمة بشوف الكذب بشكل أوضح..
أشعة الصمت اللي فوق البهرجة
بتعرّي حقيقة الزيف الفضفاضة
بتفضّح بسكوتها كلام شفاف متلّون
مَالي فراغ السطر بريحة عهر وقهر
العتمة دي نهر
بادئة من أول الحزن الساكن في سواد العين
بـ تحسس في طريقها
على البرق..
على الحرق..
على الخرق..
شايفة وبقوة..
جـارفة وفي نور الليل
تحت عبايتها المخمل
كل الأصوات الصفرا العالية عن حد المنطق..
حافرة بمخالب وقت..
وقت ومستقطع من وقت..
تشلّح أوراقك عن غُصنك غصب..

و تقولك :
محتاج كام مرة تموت علشان تفهم..؟
و بقيمة رعشة أحبالك من جوفك..؟
و بحركة خاصة أفكارك أو رفضك..؟
: انطق
محتاج كام مرة تموت.؟
محتاج كام مرة تضيع وفي عز النور..؟
محتاج كام مرة تتعرى و أدام الخلق علشان تعرف بأمانة؟
ايه معنى الصدق..؟