يبقى انت أكيد في مصر
لما الإعلام يقولوا لك.. متقولش عليه "مـ...." وقول عليه "سـ...".. يبقى انت أكيد في مصر.
لما أي حد يتكلم عن القوى العليا في البلد, يتاخد ويرجع يقول دول ادّوني بسكوت وشاي.. يبقى انت أكيد في مصر.
لما متلاقيش ناس محترمة غير أيام الثورة.. وبعد الثورة تقول طيب الأخلاق دي كلها راحت فين.. يبقى انت أكيد في مصر.
لما تقبض لي على واحد اتصور في كل حتة في البلد وتقول جبنا الجاسوس أهو, وكل الحرامية الكبيرة بيتضرب لها تعظيم سلام أو قاعدة مرتاحة على البحر... يبقى انت أكيد في مصر.
لما أي حد يمسك سلطة نطبل له ونقول له يا حلاوتك يا جمالك.. يبقى انت أكيد في مصر.
لما نقعد نقول دة محتاج يتغير ودة وحش ودة بتاع، ومنحاولش نغير من نفسنا ونزعل لو اتقال لنا غير من نفسك وابدأ بنفسك.. يبقى انت أكيد في مصر.
لما نغني "اخترناك اخترناك " لكل من هب ودب من غير تفكير, لمجرد إنه في موقع سلطة.. يبقى انت أكيد في مصر.
لما تلاقي نفس الناس والوسائل الإعلامية اللي بتشتم في شخص.. هي نفسها اللي كانت ميتة في دباديبه و"بتبوس إيده".. يبقى انت أكيد في مصر.
لما تلاقي شعب يقول لك حكم وأمثال هو نفسه مش بيمشي بيها.. يبقى انت أكيد في مصر.
لما تلاقي "شفافية" في كل حاجة كدة عمال على بطال.. يبقى انت أكيد في مصر.
لما تلاقي الأجانب واخدين وضعهم أوووي في البلد على عكس المصريين اللي حق.. يبقى انت أكيد في مصر.
لما تحاول إنك "تتبرّى" من أصلك المصري, ومتكنش فخور غير بعد الثورة.. يبقى انت أكيد في مصر.
لما متعرفش تفرق مين بيقول الصح والغلط.. ولما ناس تطلع تقول كلام وتنفيه في نفس ذات اليوم.. يبقى انت أكيد في مصر.
في لسة كتير في مصر.. ومتقولش إيه إدّتنا مصر، قول هتدّي إييييييه لمصر؟؟
مصر هي أم الدنيا.. بس إمتى هنتظبّط احنا كمصريين بقى؟؟
ولا احنا المظبوطين.. ومصر اللي مش ماشية تمام ولا إيه؟!!
