بيوت مصرية

مشهد 1 - نهار / داخلي
________________
يجلس عبد الله يشاهد التليفزيون, بينما والده محمد يقرأ الصحيفة كعادته كل يوم, فجأة يرن جرس التليفون, يسرع عبد الله للرد وقبل وصوله للرد يحدثه أبوه.

والده ( محمد ): بقولك إيه يا عبد الله..
عبد الله: نعم يا بابا..
والده: لو حد عايزنى قوله إني مش موجود.
عبد الله: طيب يا بابا مش كدة أنا هكدب وحضرتك قولت اللي يكدب يروح النار؟!
والده: لا يا عبد الله يا حبيبي دي كدبة بيضة!
عبد الله: يعني عادي يا بابا؟
والده: أيوة يا عبد الله وأوعى تقول لحد إني موجود النهاردة أي حد يتصل قوله بابا مش موجود.
عبد الله: حاضر يا بابا.

Cut
......
مشهد 2 - نهار / داخلي
________________
تخرج بسمة من غرفتها مرتدية ملابسها, متجهة إلى غرفة والدتها مستعدين للخروج ووجدت والدتها ما زالت تجهز أمام المرآة.

بسمة: إيه يا ماما مش يلا عشان منتأخرش.
مامتها: خلصت أهو يا بسمة..
بسمة: ماما أنا عايزة ألبس نقاب زيك كدة حاسة إني هستريح لو لبسته
مامتها: لسه بدري عليه مش دلوقتي
بسمة: وليه مش دلوقتي؟
مامتها: ابقي البسيه لما ربنا يسهل كده ويجيلك ابن الحلال وحياتك تستقر
بسمة: يا سلام، طيب افرضي مجاش بقى؟
مامتها: يا حبيبتي أنا عيزاكي تلبسي دلوقتي وتتشيكي زي صحباتك وتعيشي سنك وزي ما قولتلك كل حاجه ليها وقتها، وبعدين هو ايه اللي ميجيش هو انتي شوية ده انتي قمر
بسمة: ماشي يا ست ماما.. يلا بينا بقى عشان احنا اتأخرنا
مامتها: يلا بينا يا بسومتي

Cut
.......
مشهد 3 - ليل / داخلي
________________
تجلس هويدا والدة عمرو مع زوجها صلاح في غرفة النوم تندب حظها في يوم مشئوم لا يتوقعه أحد, هو يوم نتيجة الثانوية العامة. وجلسا متألمين معصومي الأيدي يفكران في حل للخروج من هذا المأزق.

صلاح: ليه بس كده يارب؟.. هيدخل ايه طيب بمجموعه ده اخص عليك يا عمرو
هويدا: اخص عليه ليه ما أنت كنت شايف يا عيني مكنش بيعرف ياخد نفسه من الدروس والمذاكرة
صلاح: أنا عارف إنه عمل اللى عليه بس 90 % دول هيدخل بيهم ايه؟!
هويدا: يلا بقى يا صلاح ربنا عايز كده الحمد لله
صلاح: الحمد لله بس أنا كان نفسي يدخل طب عشان يبقى زي عمه، وأهو يشتغل معاه بالمرة وأطمن عليه إنه استقر في شغل كويس وحياته مستقرة.
هويدا: طب إيه رأيك يا صلاح لو دخلناه حقوق، وتخلي ابن عمتك يتوسط ليه ويخليه وكيل نيابة؟.. حتى لو دفعنا فلوس مش مشكلة المهم مستقبله يكون كويس.
صلاح: تصدقي فكرة أهو حتى يبقى سلطة، وحتى لو احتاجوا فلوس مع الوسطة مش مشكلة كله يهون في سبيل مستقبله..
بس ايه الأفكار الحلوة دي كانت تايهة عني فين دي؟!
هويدا: عشان تعرفوا بس انكوا متقدروش تستغنوا عننا... ادعى انت بس الموضوع يتم على خير
صلاح : إن شاء الله خير

Cut
......
مشهد 4 - ليل / داخلي
________________
يجلس وائل في البلكونة ينتظر مكالمة من أصحابه للخروج في نزهته المعتادة يوم الإجازة، وفجأة موبايل وائل رن فتعجل بالخروج وأثناء خروجه نادى عليه والده وطلب منه إلقاء بقايا سجاير. فقام بذلك وهو متضرر.

وائل: أنا مش عارف لزمتها ايه البتاعه المقرفه دي
والده: والله يا بني ما ليها أى لزمة بس نعمل ايه بقى!
وائل: أنا صحابي برضو بيدخنوا مش عارف ليه
والده: أوعى يا وائل تعمل زيهم.. ربنا يكفيك شرها يابني
وائل: طيب ما تحاول تبطلها يا بابا
والده: ربنا يسهل يا وائل بس المشكلة إني اتعودت عليها.. سيبها على ربنا

Cut
.......
مشهد 5- نهار / داخلي
________________
يجلس كريم مع والده يشاهد برنامجًا دينيًا في انتظار ميعاد درسه الخصوصي وكانت حلقة البرنامج تتحدث عن التوبة. فيأتي اتصال إلى الشيخ مقدم البرنامج.
المتصل: يا شيخنا أنا دلوقتي كنت والعياذ بالله زاني بس توبت والحمد لله بس حاسس إن ربنا مش هيسامحني
الشيخ: أهم حاجه إنك تعقد النية وتندم على كل شيء عملته وتأكد إن الله غفور رحيم
ينظر كريم لوالده ويقول: بابا هو إيه زاني دي؟
والده: لما تكبر هتعرف يا حبيبي.
يزيد فضول كريم وعندما يأتى معاد الدرس يذهب ويلتقي بأصحابه ويتوجه بالسؤال إلى أقرب صديق له
كريم: بقولك إيه يا أحمد انت عارف يعني إيه زاني
أحمد: أهاااااااا أيوه يا بني, هو انت متعرفش؟.. أنا هقولك

Cut
.......

إيه رأيكوا في الحاجات دي.. حاجات زي الفل.. (كدب وتناقض وازدواجية وبلاوي) كفيلة أنها تودي أطفالنا وأولادنا في ستين داهية. ممكن تكون مسألة نسبية بتختلف من بيت لبيت ومن أسرة لأسرة ومن ثقافة لثقافة.. لكنها بتحصل وبنسبة كبيرة جدًا جدًا جدًا في مجتمعنا.