عن حضانة طنطا


الفيديو ده لمدرس بيضرب عيال في حضانة فـي طنطا، البعض قال أنه هو أصلا صاحب الحضانة دي، والحضانة دي اتقال إنها جوة مركز رياضي تقريبا تابع للشباب والرياضة.. يعني هيئة حكومية. طب الراجل ده يتحاسب ازاي؟
السخيف بقى.. ان اتقال انه كان بيضرب العيال بناء على رغبة أولياء أمورهم! يعني أولياء أمور العيال عايزين عيالهم يتضربوا!

في أمريكا لما الأب أو الأم يؤذوا عيالهم ماهياش سايبة.. ومش لمجرد إنه خلفه يبقى خلاص يعمل فيه اللي هو عايزه
دة الابن أو الابنة ممكن يرفعوا قضية على أهاليهم ويبهدلوهم.. أي والله يبهدلوهم
وممكن أصلاً بغير رغبة الآباء ولا الأبناء.. الحكومة تتصرف من نفسها وتاخد العيل من أبوه أو من أمه وأبوه أو أمه يقفوا في المحاكم يعيطوا -زي ما بنشوف في الأفلام- ويقولوا والله هعامله حلو ومعلش وسماح النوبة آخر مرة
سماح النوبة آخر مرة؟.. أمّال احنا عندنا مفيش كدة ليه؟
أو بلاش كدة.. احنا عندنا إيه اللي يضمن حق عيال زي دول أهاليهم حرضوا مدرس وصاحب حضانة إنه يبهدل عيالهم كدة؟
العيال دي لما تكبر هتبقى إيه؟ وهتبقى عاملة ازاي؟
شخصيتهم هتبقى عاملة ازاي؟.. وفكرتهم عن البلد هتبقى إيه؟
هيفيدوا مصر بإيه؟
هيطلعوا حاقدين وناقمين على المدرس دة وعلى أهلهم وعلى الحضانة والنظام التعليمي ونظام البلد كلها، وهيفضلوا فاكرين الموقف ده طول حياتهم.

من المواقف اللي أنا عمري في حياتي ما أنساها.. مرة كنت أنا ووالدتي وأختي في الشارع بنشتري حاجات وواحنا في محل بيبيع أجهزة إلكترونية وشرايط كاسيت.. الراجل إدّانا بوسترين، أختي خدت بوستر لهرقليز.. وأنا خدت بوستر لمايكل جاكسون .
رجعنا البيت وعدينا على بابا في العيادة اللي في الدور الأول، وقلنا له النهاردة جبنا كذا وعملنا كذا.. بص عالبوسترين، راح واخد مني البوستر بتاع مايكل جاكسون.. ومن غير أي انفعالات أو تغير في ملامحه ومن غير ما يقول أي كلمة.. راح مقطع البوستر، بصيت له في ذهول وقلت له عملت كدة ليه؟
قال لي ما معناه إن مايكل جاكسون مش هيخش البيت وإنه شخص مش محترم والمفروض مانشيلش صوره وإن دة غلط وإن... إلخ.
السؤال دلوقتي.. هل أنا كدة اقتنعت بإن مايكل جاكسون غلط؟
هل اقتنعت بإني المفروض ماشيلش صور مايكل جاكسون أو ماتفرجش عليه أو أهتم بيه؟
بالعكس بقيت انزل لجاري أتفرج معاه على شرايط فيديو مايكل جاكسون لا لشئ إلا لمجرد العند.. وعدت حوالي 15 سنة ودلوقتي بتفرج على مايكل جاكسون وبحب أغاني لمايكل جاسكون وبسمع
Smooth Criminal و Billie Jean و You Are Not Alone و They Don't Care About Us و The Way You Make Me Feel
وفضلت طول العمر فاكر الموقف ده
هل هو كدة علمني إن مايكل جاكسون غلط؟
هل هو كدة رباني؟
هل العيال دي كدة عرفت إنها المفروض تعمل الواجب عشان لو ماعملتش الواجب هيخشوا النار ولو عملوا الواجب هيبقوا وزراء؟


أخيرًا.. فيديو الراجل ده والعيال دول.. فكرنى بالفيديو اللي جاي ده
نفس الفكرة أنا معايا سلطة وقوة..أنا أتحكم فيك زي ما أحب


نفس السلطة.. نفس التحكم.. نفس الإهانة.. نفس الضحك والاستهزاء من اللي بيصور
وكفاية عشان مايبقاش بوست عن التعذيب في الأقسام المصرية.

الراجل ده نتاج فترة حكم الطوارئ، نتاج للضغط العصبي والجري ورا لقمة العيش, نتاج الفقر والضرايب والظلم والذل والتحكم والتعنت والإهانة.
والعيال دي لو ما لحقناهاش هايبقوا كدة هما كمان.. هايبقوا الراجل اللي معاه سلطة وبيستغلها لإشباع رغبته في التحكم ومش هانخلص
 
كتاب المئة تدوينة. Powered by Blogger.

التصنيفات

القائمة الكاملة للتدوينات

 

© 2010 صفحة التدوينات المرشحة لكتاب المئة تدوينة