عالية قوي

أكتر حاجة باكرهها فيكي
إن ضحكتك لما بتطلع
عالية قوي
بتفاجئ العالم
زي شبكة واسعة بتترمي
على نهر ساكن
كل واحد حواليكي
بتتولد جواه لوحة مختلفة
بتبدأ تختار ألوانها
وتتجنب المساحات الفاضية
والزوايا الحادة
أكتر حاجة بيبقى نفسي فيها ساعتها
إني أنا بس اللي يسمع ضحكتك
ويوزعها
أنا اللي أختار لكل واحد لوحته
مش عايز ألوان كتير
أو ضوء مبالغ فيه
أو ورد أصفر
مش عايزه يمشي كمان شوية
واللوحة دي جواه
بيضيف لها من كلامه
ويعدل في شوية حاجات
شايف إنها مش شبهه قوي
لحد ما يبعد
وينسى
ويبص جواه فجأة
يلاقي اللوحة دي
يفتكر ضحكتك
اللي ضحكتيها ليه
هو لوحده


الكاتب:  مصطفى السيد سمير المدوّنة: سما زرقا وطيارات ملونة 
 
كتاب المئة تدوينة. Powered by Blogger.

التصنيفات

القائمة الكاملة للتدوينات

 

© 2010 صفحة التدوينات المرشحة لكتاب المئة تدوينة