فلســــطين > غــزة

كان ياما كان في قديم الزمان وسالف العصر والأوان. أيام ما كنت في بروكسل .. في أكتوبر 2009. صار معايا موقف غريب.. في محل ملابس طلع صاحبه باكستاني. كنت بدور على حاجة أجيبها هدية لأختي.. والراجل بيحاول يساعدني.. وفتح معايا حوار إنتي من وين وإيش بتعملي هنا والكلام هادا. فأنا على سؤال إنتي من وين .. جاوبته: I'm from Palestine وبيّنت عليه علامات إنو ماعرفهاش.. قال لي حاجة زي: إيش الاسم الغريب هادا؟ وين بتطلع البلد هادي؟
قلت له: Palestine ... the Middle East .. you know !
وهو أبدًا مش عارف.. وأنا ماسكة حالي بديش أحكي له "إحنا البلد اللي عاملة مشاكل مع إسرائيل" :S
بعدين قلت له: طيب.. Gaza, do u know Gaza؟
طبعًا إحنا كنا لسة طالعين من حرب كانت عاملة شنة ورنة في العالم.. بروكسل كلها كانت تطلع مظاهرات ضد الإفترى تبع إسرائيل. فالراجل وشه تهلل !! وقال لي: اااااه .. Sure I know Gaza !
قلت له: بس ! عاد غزة هادي.. موجودة جوة فلسطين !
ـــــــــــــــــــــــــــــــــ

بس خلاص ! هادا هو الموقف اللي صار معايا.. وبحكيه للناس من ضمن الطرائف اللي صارت معايا في بروكسل ويمكن يكون موقف مضحك.. بس لما أفكر فيها بشكل عميق بنرفز.. يعني غزة صارت أشهر من فلسطين! المدينة صارت أشهر من البلد؟!!
إحنا فعلاً وصلنا لهادي المرحلة... تقسيم المقسّم وتجزيء المجزّأ.. ناس كتير اختزلت قضية فلسطين في حصار غزة وحرب غزة وإعادة إعمار غزة.. حتى فيه ناس كتير عالفيس بوك وتويتر كانوا عاملين دعوات للزحف إلى "غزة" في ذكرى النكبة :S
يا عمي اسمها فلسطــــين!!
وأنا على فكرة فلسطينية.. مش غزاوية!!
وبالإنجليزي:
 I'm a Palestinian living in Gaza , I'm not Gazan !!

اللي بدي أحكيه بالنهاية إنه كلنا للأسف وقعنا في هادا الغلط.. وبيوم من الأيام قلّصنا المعادلة تبعت القضية الفلسطينية إلى فلسطين = غزة.. وحتى وأنا بدور على صورة مناسبة لهادي التدوينة لقيت كاريكاتير بيقول "غزة عاصمة المقاومة العربية"... نعم؟؟
محدش يفهمني غلط.. أنا بحب غزة كتير.. ومش ضد إنه العالم يتعاطف معها.. بس فيه ناس كتير عنا ماشيين على نظام "أنا بس اللي ماكل هوا.. محدش يتعاطف مع حد غيري!" وكأنه محدش غيره بيعاني. لأ يا جماعة كل مدينة في فلسطين عندها معاناتها الخاصة.. ومحدش ماكل هوا أكتر من حد.. كلنا زي بعض .. وكلنا صحاب قضية واحدة.. ولو سألتوني عن أكتر حاجة بتمناها بعد المصالحة.. إنه يرجع جواب سؤال إنت من وين؟ بدل أنا غزاوي أو أنا ضفّاوي أو أنا مقدسي أو أنا 48.. إنه يصير:
"أنا من فلسطين"
 
كتاب المئة تدوينة. Powered by Blogger.

التصنيفات

القائمة الكاملة للتدوينات

 

© 2010 صفحة التدوينات المرشحة لكتاب المئة تدوينة