علمونا زمان كتير قالوا حبوا المدرسة.. بس غريبة كان بيحصل كتير هروب من المدرسة.. كتير نفور.. كتير خوف.
هما علمونا صح..علمونا نحب صح... ولا علمونا نخاف.. ولا علمونا إيه؟؟
علمونا بردو كمان.. قالوا حافظوا عالمدرسة.. فاكر أنا أيام زمان.. لما قالوا المدرسة بيتي.. بس الغريب في دة.. إن بردو كنا نرمي أي حاجة في المدرسة.. والغريب كمان إن عمرنا ما حسينا بيتنا في المدرسة.
هما علمونا صح؟ علمونا نحب صح... ولا علمونا إيه ؟؟
فاكر أنا أيام زمان.. قالوا حافظوا على النظام.. بس دايمًا تلاقينا مفيش بيننا وبينه عمار.
هما علمونا صح.. ولا علمونا إيه ؟؟؟ قالوا مرة إزاى ننظم؟ ولا قالوا حافظوا عليه؟
طيب هما عرفونا.. هو إيه معنى النظام؟؟
نظام؟؟
يبقى بمناسبه النظام..
قالوا دايمًا احترموا النظام.. قالوا الريس ده أبونا... قالوا الست دي ماما.. قالوا دة كان في الضربة الأولى...طلعوا سارقين مننا ياما.
هما علمونا إيه؟؟؟ ولا علمونا ليه؟؟ هما علمونا صح؟؟؟؟ ولا أنا غبي ولا إيه؟؟
قالوا الحكومة دي مية مية.... خططها في التنظيم.. عالمية... مفيش زيها.. خططها... ذرية.
نيجي بعد كده يا خال... نلقى كل واحد خاااان.. من الحكومة العالمية.. سارق له ييجي مليون... ومية.
هما علمونا إيه؟؟ ولا علمونا ليه؟؟ هما علمونا صح؟؟ إحنا عبط ولا إيه؟
لما قامت ثورة مرة... قالوا الثوار دول خونة.. واحنا زي العبط قولنا.. اقتلوا الثوار الخونة.. فجأة ظهر الحق نور.. طلعوا عصابة كلها زور..
هما علمونا ليه؟؟
هما علمونا إيه؟؟
هما علمونا صح؟؟
ولا ده يبقى اسمه إيه؟
