كام مرة

كام مرة صحينا, من النوم ابتدينا, يومنا بشجن وفي الليل نهينا, كأن اتعادينا, وطيرنا اتسجن
كام مرة اتدفن حماسنا وطال سكاتنا وخنوع آهاتنا جوه البدن
كام مرة طوّل, كلامنا وأوّل, ما راح حلاوته بان الخداع
كام مرة خدنا جبهة دفاع
كام مرة سبنا الروتين ياخدنا
كام مرة في لقانا, في ليل سهادنا كان الوداع
كام مرة اختلفنا في وجهات النظر
كام مرة عانينا ظروف الحياة
كام مرة شغل , كام مرة سفر
كام مرة احتملنا علشان نكمل, فوق احتمال كل البشر
كام مرة كأن الوشوش غريبة, كأن النفوس صبحت كئيبة
كام مرة فتور, كام مرة نفور, كام مرة السؤال بقي كله عيبة
كام مرة لأ, لا يمكن نكمل
كام مرة كل نظراتنا ريبة
كام مرة بعتي وأنا اشتريت, كام مرة بعت بعدين بكيت
كام مرة رحنا, بغباء كافحنا, لحد ما كان فيه بنا خيط
كام مرة عانيتي كام مرة عانيت
كام مرة ندمنا وتُبنا وفهمنا, خلافنا البسيط
كام مرة خرجنا للنور وشوفنا صورتنا في بيت
كام مرة قلنا خلاص نسيت

ولجل الحلال . .
ولجل العيال . .
رجعنا ولسان حالنا قايل كِفيت.